Servodatoahppu 8-10 - page 92

Eanet asylrievtti birra
Áiggiid čađa leat olbmot geat leat ballan vearrivuođas ja
mávssaheamis, ohcan dorvvu dehálaš olbmuin, fámolaš
sogain ja girkus.
Girku lea leamaš guhkit áigge dorvobáikin sidjiide geat
leat oaguhuvvon. Jáhkku lea leamaš ahte ii oktage háliit
gutnehuhttit bassi girkolanja. Buot girkut galge beassat leat
ráfis, ja dan seammá galge sii ge geat ledje girkus. Nu lea
girku asylrievtti sisdoallu.
Nuppi máilmmesoađi áigge lei hui dábálaš ahte olbmot
báhtaredje girkuide ja kloastariidda. Muhto nasisttat eai
doahttalan girkuid eai ge kloastariid. Dáhpáhuvai dávjá ahte
ovdamearkka dihtii juvddálaččat vižžojuvvojedje girkuin ja
kloastariin. Maiddái maŋŋá leat olbmot báhtaran girkuide.
Soađi áigge Balkanis 1990-jagiin bohte ollu báhtareaddjit
Norgii. Dalle vuot bođii girku asylriekti atnui. Bearrašat
Bosnias ja Kosovos ohce dorvvu girkus dannego balle sin
sáddejit ruovttoluotta.
Sisafárrejeaddjit, báhtareaddjit ja asylohccit
Sisafárrejeaddji
(olgoriikkalaš) lea son geas ii leat
báhtareaddji stáhtus, muhto sus lea bargo- ja
orostallanlohpi. Son oažžu vuolgit ruovtturiikii goas ieš
háliida.
Báhtareaddji
lea son gii lea ožžon báhtareaddji stáhtusa
Norggas dahje ON:a báhtareddjiid kommisearas.
Asylohcci
lea son gii boahtá Norgii ja sus ii leat makkárge
dáhkádus ahte beassá leat Norggas, ja dávjá báhpáriid
haga. Son ohcá asyla go boahtá Norgii. Eai nu gallis oaččo
asyla, earát sáddejuvvojit olggos Norggas.
Kvohtabáhtareaddji
lea son gii boahtá Norgii Stuorradikki
ja ráđđehusa mearrádusa vuođul. Válljen dáhpáhuvvá
ovttas ON:a báhtareddjiid kommisearain, Genèves. Sis lea
báhtareaddji stáhtus ovdal go bohtet Norgii.
90
1...,82,83,84,85,86,87,88,89,90,91 93,94,95,96,97,98,99,100,101,102,...340
Powered by FlippingBook