- Dáinna girjjiin lea munnos doaivva ealáskahttit luonddunamahusaid beaivválaš sámegiela geavaheamis, ja soaitá erenoamážit go mehciin jođaša. Girjái leat čohkkejuvvon luonddunamahusat eanaš siseatnamis Sámis, muhto leat maiddái váldon mielde dábáleamos namahusat riddoguovlluin.

Lea dieđusge nu ahte sáhttet leat namahusat main leat báikkálaš sierranas áddejumit, ja moai letne dakkár erohusaid merkestallan guđe guvlui gullet.

- Loahpas sávve girjji šaddat gelddolaš gaskaoapmin movttáskahttit olbmuid fas geavahišgoahtit luonddunamahusaid mat leat jávkamin, lohkaba girječálli guovttos.

Luonddunamahusat addet čielga gova das man láhkai luondu lea. Dađibahát lea namahusat olles leavttos dál jávkamin. 

- Maiddái sii geat ollu johtet luonddus eai šat dovdda buot dáid namahusaid luonddus. Girji lea  maid hui dehálaš gáldu boahtevaš boalvvaide, muittoheaba čálliidguovttos.

Luonddunamahusat lea čállon guovttegillii, sámegilli ja dárogillii.

Sámi fágagirjjálašvuođa searvi lea dorjon giehtačállosa barggu ja ČálliidLágádus lea vuoruhan girjji deaddileami Sámedikki doarjjaruđadin.