Sámis lea ain eambbo go Norggas unnánan girjejohtu. ČálliidLágádus sáhttá leat dasa buorre ovdamearkan. Lágádusas lea girjejohtu gahččan sullii 70 proseanttain njukčamánus go buohtastahttá mannan jagi gaskamearálaš loguin.

 

Gávpi - girjegávpi Sámis
Sámis ii dáidde odne leat go okta vuovdinbáiki man sáhttá gohčodit girjegávpin, namalassii Girjjálašvuođaguovddáža gávpi Kárášjogas. Gávpi vuovdá buot sámi girjegoasttideaddjiid girjjiid. Fasto maiddái dáža lágádusaid girjjiid. Jođiheaddji Ragnhild duođašta ahte oppalaččat lea girjegávppi girjejohtu gahččan, ja sámi girjejohtu ollu eambbo go dan maid girjegávppit Norggas odne muitalit. Vaikke vel dál lea gávppis ollu eará gálvvut ge lassin girjjiide, de ferte goit dál jearrat man guhká gávpi ceavzá jos korona-vahát bistá.

 

Neahttagirjegávpi
Norggas fuomášahttet dál dan ahte go girjegávppiin lea gahččan girjevuovdin, de lea neahttagirjegávppiin fas lassánan girjejohtu. Girjjálašvuođaguovddáža gávppis ii leat leamaš neahttagávpi. Dál de galgá Girjjálašvuođaguovddáš viimmat rahpat neahttagávppi, doaivumis juo boahtte vahkus. Doaivumis dat rahpá maiddái sámi girjevuovdimii buoret vejolašvuođaid. Girjjálašvuođaguovddáža neahttagávppis galgá sáhttit gávdnat buot sámi lágádusain ilbman sámi girjjiid. Ja dieđusge maiddái dáža lágádusaid girjjiid. Neahttabáikki čujuhus lea vuos dárogillii: www.gavpi.org.

 

Muhtin finada gal ain gávppis dáid áiggiid. Gávppi jođiheaddji Ragnhild doaivu korona-balva fargga livččii mannan badjel. Son rahpá fargga Girjjálašvuođaguovddáža neahttagávppi, ja doaivu girjeráhkisteaddjit dás gávdnet girjji maid leat ohcamin. (Govva: Girjjálašvuođaguovddáš)