Sámis áiggis áigái jođus

Vuossárgga guovvamánu 3. beaivve čájeheimmet Sámis áiggis áigái 40 oahpaheaddjiide Tromssa Báhpajávrri skuvllas. "Dán mii gal fertet jođánit  oažžut Tromssa gieldda skuvllaide”, dajai Báhpajávrri skuvlla rektor Judith Ellinor Martinsen maŋŋá dáhpáhusa sin skuvllas.

Oahpaheaddjit geat ledje boahtán dán skuvlatiibmui gal maid jearraledje: "Manne bat diehtit nu unnán sámi historjjás?”. Sis gal lei dasa maiddái fástádus, namalassii dat go skuvllat Norggas leat badjelgeahččan dán oahppofáddá. Tromssa skuvllat gal odne leat bures ovddideamen oahpahusa sápmelaččaid birra, ja dáidet leat Norgga gielddaid gaskkas ovddimuččas dáinna oahpahusain. Vuosttas vahkku guovvamánus lea juohke jagi Tromssas "Sáme vahkku”, ja buot skuvllat barget erenoamážit dán vahku sámi fáttáiguin.
 

Govas John Trygve Deanu Sámeskuvllas mannan čavčča go álggaheimmet čájehanráiddu. (Govva: Birgitte Wisur Olsen, Ságat)

Nu heivii ge bures dat ahte Girjjálašvuođaguovddáš ovttas ČálliidLágádusain ja Troandin ablemagic ásahusain fálai čájehit oahpponeavvu Sámis áiggis áigái áiddo dál. Appa lea interaktiiva oahpahus sámi historjjá ja kultuvrra birra skuvlamánáide miehtá Norgga. Teavsttain, jienain, govaiguin ja musihkain muitala appa Sámi birra davvisámegillii máttasámegillii ja dárogillii. ČálliidLágádus doaivu fargga fidnet ruhtadeami ráhkadit maiddái julevsámi veršuvnna. 
 

Riikkaráját davvin 1852 sirrejedje álbmoga bijadettiin sárgá kártii.
Dát govat leat Appas.

Dáinna appain sáhttet oahppit skuvllain Norggas álkidit oahppat sámi historjjá. Skuvlla fágaplánat eaktudit dan ahte oahppit ožžot dákkár oahpu. Appa heive 4. jahkeceahkis bajás. Oahppit sáhttet fargga ieža jođašit áigesárgá mielde, ja Árbevierut oasis gávdnet ollu dehálaš dieđuid sápmelaččaid birra.

Sámis áiggis áigái gávdná dáid neahttabáikkiin, Android Playbutikk ja Apple App Store. Máksá NOK 179,-.
 
         





Almmuhan: 07.02.2020
Almmuhan: Mihkku Solbakk