Girjjálašvuođabálkkašupmi Siri Broch Johansenii

Sámiráđi Lars Miguel Utsi geigii jagi 2016 girjjálašvuođabálkkašumi Siri Broch Johansenii Gironis. Govven: Amund Johnskareng
 
Sámiráđđi geigii jagi 2016 girjjálašvuođabálkkašumi Siri Broch Johansenii nuoraidromána ovddas ”Mun lean čuoigi” 22.10. Gironis

Sámiráđi árvvoštallanlávdegoddi cealká earret eará ná:
 
 
Siri Broch Johansen govvida bures movt sámi nuorat šaddet bajás ovttain julggiin sámi kultuvrras ja nuppiin julggiin ođđaáiggi máilmmis. Muitalusas lea olu man beallešaddit soitet dovdat dehe ieža vásihit ja dat geasuha lohkki, fille su beroštit muitalusa nuoraid birra. Girječálli duostá čállit tabuaáššiid birra, dego seksa ja jápmima birra. Girji guoskkaha dovdduid dego ráhkisvuođa, balu, heahpaneami ja morraša rabas ládje bártni perspektiivvas. Das lea njuovžilis ja gehppes giella mii heive bures nuorra lohkkiide. Muitalus čuohcá dovdduide, joksá lohkki váimmu ja báhcá guhka muitui.
 
ČálliidLágádusa girječálli Siri Broch Johansen lea maid ovdalis ožžon sámiráđi girjjálašvuođabálkkašumi jagis 2011 nuoraidromána ovddas Sárá Beaivegirji.


Almmuhan: 25.10.2016
Almmuhan: Mihkku Solbakk