Aage Solbakk

r. 1943. Aage Solbakk lea vuosttažettiin oahppogirječálli, muhto lea maiddá bargan lágádusdoaimmaheaddjin ja sámegiela ja kulturmáhtu logaldallin sihke allaskuvllain ja universitehtain. Ovdalis áiggis son lei áibmosuodjalusas hárjehallin, muhto visot eará bargohárjáneami ovddabeallái bidjá ieš iežas luossabivdin. Vaikko vel lea ge báberbargu su ealáhus dán áigái, de Aage dattege eallá Deanu jahkeáigodagaid mielde, dego dolin dahke. Aage erenoamáš diehtosuorggit leat osku, siidaservodaga vuoiŋŋalaš eallin, dábit, vierut ja birgenkoansttat.

Aage lea almmuhan dievva girjjiid sámi historjjá birra, dego Sámi historjá I-III, Deanuleahki — sogat, historjá, 2001, Ávjovári - Kárášjoga historjá I, 2000, ja soaitá buot dehálemos su olu girjjiid gaskkas leat dat maid vieljainis Ivváriin ovttas lea čállán, Kulturmáhttu, 2005, mas čilgeba mii sápmelaččaid kultuvrras lea erenoamáš ja earalágan go earáin. Girjji vuolletihttel lea ge: árbevierut ja kulturerohusat.

Aage Solbakk lea maiddá doaimmahan eatnat girjjiid ja čálaráidduid, dego omd Goavddis, 2003 ja Joddu, 2003, main goappašagain geassá ovdan mo sápmelaččat leat čállán ja čilgen iežaset árbevieruid divttain, cukcasiin ja muitalusain. Aage lea okta golmma doaimmaheaddjis sámi máinnas ja muitalusčoakkáldagas Min njálmmálaš árbevierru, 2004, ja lea čállán dievva áviisakronihkaid sámi kulturhistorjjálaš fáttáid birra. Aage Solbakk ássá Hilláguras, Deanus.