13
Skuvlaservodat
Dán oasis galggat oahppat
• Digaštallama ja riiddu erohusa
• Manne digaštallan dárbbaša sátnejođiheaddji ja čálli
• Manne demokráhtalaš servodat dárbbaša oktasaš
njuolggadusaid
• Makkár doaimmat leat luohttámušoahppis
Ceahkkeráđđi
Gávccát ceahkki lea digaštallamin. Emmá hállá hui čielgasit
ja dadjá: «Sii geat háliidit dadjat maidege, čálihit iežaset
sáhkavuorro-listii. Guovttis geigejit gieđa, Emmá merke
sudno namaid ja joatká: «Čuovvovažžan lea Lemeha vuorru
sáhkavuorrolisttas.»
Dalle fáhkka gullo julla ceahkkelanja maŋimuš ráđas. Doppe
lea Ánde gomihan stuolu. Huiká eanet go hállá dahje hupmá:
«De heaitte Emmá, dáinna jallas digaštallamiin! Galgat go
mii vel eanet dása golahit áiggi? Dat han gal lea čielggas
ahte mii buohkat vuolgit čierastallanmátkái. Ii han das gal
šat dárbbaš digaštallat. Dieđusge buohkat vulget!» Son
lea duođas ja fáipu gieđaiguin. Muhto Emmá ii dainna gal
suorgan. «Dán digaštallamis galget buohkat beassat muitalit
maid oaivvildit. Máŋggas leat juo dadjan ahte diekkár mátki
šaddá menddo divrras. Danne geahččalit soahpat das man
buohkat suitet. Dáinnamii gal geargat ovdal go gaskadiibmu
álgá, nu ahte Ánde, beare čohkán fas.»
Kárášjoga skuvla.
sáhkavuorru:
debattinnlegg
vuorrosátni:
replikk
※
